ಪುದುಚೇರಿ : ಪುದುಚೇರಿಯಲ್ಲಿ ವಿಧಾನಸಭೆ ಚುನಾವಣೆಯ ಮತದಾನ ಸಂಜೆ 6 ಗಂಟೆಗೆ ಮುಕ್ತಾಯಗೊಂಡಿತು. ಈ ರಾಜ್ಯದಲ್ಲಿ ಹಿಂದಿನ ಚುನಾವಣೆಯೊಂದಿಗೆ ಹೋಲಿಸಿದರೆ ಈ ಬಾರಿ 90 ಶೇಕಡಕ್ಕಿಂತ ಹೆಚ್ಚು ಮತದಾನ ದಾಖಲಾಗಿದೆ. ಇದರೊಂದಿಗೆ ಪುದುಚೇರಿ ಹೊಸ ದಾಖಲೆ ನಿರ್ಮಿಸಿದೆ.
ಪುದುಚೇರಿ ಕೇಂದ್ರಾಡಳಿತ ಪ್ರದೇಶದಲ್ಲಿ ಕಾರೈಕಾಲ್, ಮಾಹೆ ಮತ್ತು ಯಾನಂ ಪ್ರದೇಶಗಳನ್ನು ಒಳಗೊಂಡಂತೆ ಒಟ್ಟು 30 ವಿಧಾನಸಭಾ ಕ್ಷೇತ್ರಗಳಿವೆ.
ಈ ಚುನಾವಣೆಯ ಫಲಿತಾಂಶಗಳು ಮುಂದಿನ ಸರ್ಕಾರ ಯಾರದು ಎಂಬುದನ್ನು ನಿರ್ಧರಿಸಲಿವೆ.
ಪುದುಚೇರಿ ರಾಜ್ಯದಲ್ಲಿ ಇಂದು ಗುರುವಾರ (ಏಪ್ರಿಲ್ 9) ವಿಧಾನಸಭೆ ಚುನಾವಣೆಯ ಮತದಾನ ಶಾಂತಿಯುತವಾಗಿ ನಡೆಯಿತು. ಬೆಳಿಗ್ಗೆ 7 ಗಂಟೆಗೆ ಆರಂಭವಾದ ಮತದಾನದಲ್ಲಿ ಮತದಾರರು ಹೆಚ್ಚಿನ ಉತ್ಸಾಹದಿಂದ ತಮ್ಮ ಮತಹಕ್ಕನ್ನು ಚಲಾಯಿಸಿದರು.
ಚುನಾವಣೆ ಆಯೋಗವು ಮತದಾರರ ಜಾಗೃತಿ ಹೆಚ್ಚಿಸಲು ಹಲವಾರು ಕ್ರಮಗಳನ್ನು ಕೈಗೊಂಡಿತ್ತು. ಅದರಡಿ ಮತಗಟ್ಟೆಗಳಲ್ಲಿ ರೋಬೋಗಳ ಮೂಲಕ ಮತದಾನದ ಮಹತ್ವದ ಬಗ್ಗೆ ಜಾಗೃತಿ ಮೂಡಿಸಲಾಯಿತು. ಜೊತೆಗೆ ಮತದಾನಕ್ಕೆ ಬರುವವರನ್ನು ಹೂಗಳನ್ನು ನೀಡಿ ಸ್ವಾಗತಿಸಲಾಯಿತು. ಇತರ ಕ್ಷೇತ್ರಗಳಲ್ಲಿಯೂ ವಿವಿಧ ರೀತಿಯ ಜಾಗೃತಿ ಕಾರ್ಯಕ್ರಮಗಳನ್ನು ಆಯೋಜಿಸಲಾಯಿತು.
ಸಂಜೆ 6 ಗಂಟೆಗೆ ಪುದುಚೇರಿ ಕೇಂದ್ರಾಡಳಿತ ಪ್ರದೇಶದಾದ್ಯಂತ ಮತದಾನ ಪ್ರಕ್ರಿಯೆ ಮುಕ್ತಾಯವಾಯಿತು.
90 ಶೇಕಡಕ್ಕಿಂತ ಹೆಚ್ಚು ಮತದಾನ
ಈ ಬಾರಿ ನಡೆದ ವಿಧಾನಸಭೆ ಚುನಾವಣೆಯಲ್ಲಿ ಪುದುಚೇರಿ ಮತದಾನ ಪ್ರಮಾಣದಲ್ಲಿ ಹೊಸ ಇತಿಹಾಸ ನಿರ್ಮಿಸಿದೆ. ಸಂಜೆ 5 ಗಂಟೆಯ ವೇಳೆಗೆ 86.87% ಮತದಾನ ದಾಖಲಾಗಿದ್ದು, 6 ಗಂಟೆಗೆ ಅದು 90% ಕ್ಕಿಂತ ಹೆಚ್ಚಾಗಿದೆ.
ಗಮನಾರ್ಹವಾಗಿ,ಕಳೆದ 2021ರ ವಿಧಾನಸಭೆ ಚುನಾವಣೆಯಲ್ಲಿ ಒಟ್ಟು 83.4% ಮತದಾನ ದಾಖಲಾಗಿತ್ತು.
ಅಧಿಕೃತ ಅಂಕಿಅಂಶಗಳು ಶೀಘ್ರದಲ್ಲೇ ಪ್ರಕಟವಾಗಲಿವೆ. ಪ್ರಾಥಮಿಕ ಮಾಹಿತಿಯ ಪ್ರಕಾರ, ಈ ಚುನಾವಣೆಯಲ್ಲಿ ಸುಮಾರು 8,25,820 ಜನರು ಮತ ಚಲಾಯಿಸಿದ್ದು, 1,24,819 ಮತದಾರರು ಮತ ಚಲಾಯಿಸಲಿಲ್ಲ.
ಕಟ್ಟುನಿಟ್ಟಿನ ಭದ್ರತೆಯಲ್ಲಿ ಇವಿಎಂಗಳು
ರಾಜ್ಯದಲ್ಲಿ 1,099 ಮತಗಟ್ಟೆಗಳು ಸ್ಥಾಪಿಸಲಾಗಿದ್ದು, ಇವಿಎಂ ಮತ್ತು VVPAT ಯಂತ್ರಗಳನ್ನು ಬಳಸಲಾಗಿದೆ. ಮತದಾನ ಮುಗಿದ ನಂತರ ಎಲ್ಲಾ ಯಂತ್ರಗಳನ್ನು ಮಾನ್ಯತೆ ಪಡೆದ ರಾಜಕೀಯ ಪಕ್ಷಗಳ ಪ್ರತಿನಿಧಿಗಳು ಮತ್ತು ಏಜೆಂಟ್ಗಳ ಸಮ್ಮುಖದಲ್ಲಿ ಸೀಲ್ ಮಾಡಲಾಗಿದೆ.
ನಂತರ, ಶಸ್ತ್ರಸಜ್ಜಿತ ಭದ್ರತಾ ಪಡೆಗಳು ಮತ್ತು ರಾಜ್ಯ ಪೊಲೀಸರ ಕಾವಲಿನಲ್ಲಿ ಈ ಯಂತ್ರಗಳನ್ನು ವಾಹನಗಳ ಮೂಲಕ ಪುದುಚೇರಿಯ ಸ್ಟ್ರಾಂಗ್ ರೂಮ್ಗೆ ಕಳುಹಿಸಲಾಗುತ್ತಿದೆ.
ಮೇ 4ರಂದು ಫಲಿತಾಂಶ
ಎಲ್ಲಾ ಇವಿಎಂಗಳನ್ನು ಸ್ಟ್ರಾಂಗ್ ರೂಮ್ನಲ್ಲಿ 24 ಗಂಟೆಗಳ ಸಿಸಿಟಿವಿ ನಿಗಾವಳಿ, ವೀಡಿಯೊ ದಾಖಲಾತಿ ಹಾಗೂ ಕೇಂದ್ರ ಭದ್ರತಾ ಪಡೆಗಳು ಮತ್ತು ರಾಜ್ಯ ಪೊಲೀಸರ ಮೂರು ಹಂತದ ಭದ್ರತೆಯಲ್ಲಿ ಇರಿಸಲಾಗುತ್ತದೆ.
ಇದಾದ ನಂತರ, ಮೇ 4 (ಸೋಮವಾರ)ರಂದು ಮತ ಎಣಿಕೆ ನಡೆಯಲಿದ್ದು, ಚುನಾವಣಾ ಫಲಿತಾಂಶಗಳು ಪ್ರಕಟವಾಗಲಿವೆ.
ವರದಿ :ಸಂಧ್ಯಾ ಪ್ರಸಾದ್ ಪಿ ವಿ.
