ಮಾನವ ಬದುಕಿನ ಅತಿ ಸುಂದರ ಆವಿಷ್ಕಾರಗಳಲ್ಲಿ ಗೆಳೆತನವೂ ಒಂದು. ಅದು ರಕ್ತಸಂಬಂಧಗಳಿಂದ ಹುಟ್ಟಿದ ಬಂಧನವಲ್ಲ; ಹೃದಯಗಳ ಸಾಮರಸ್ಯದಿಂದ ಅರಳಿದ ಭಾವಲೋಕ. ಜನ್ಮವು ನಮಗೆ ಬಂಧುಗಳನ್ನು ನೀಡಬಹುದು; ಆದರೆ ಜೀವನವು ನಮ್ಮ ವ್ಯಕ್ತಿತ್ವಕ್ಕೆ ತಕ್ಕ ಗೆಳೆಯರನ್ನು ಉಡುಗೊರೆಯಾಗಿ ನೀಡುತ್ತದೆ. ಆದ್ದರಿಂದಲೇ ಗೆಳೆತನವು ಪ್ರಕೃತಿಯ ಅತ್ಯಂತ ಅಪೂರ್ವ ಅನುಗ್ರಹಗಳಲ್ಲಿ ಒಂದಾಗಿದೆ.
ಗೆಳೆತನವು ಕೊಡು-ಕೊಳ್ಳುವ ವ್ಯವಹಾರವಲ್ಲ; ಲಾಭ-ನಷ್ಟಗಳ ಲೆಕ್ಕಾಚಾರವೂ ಅಲ್ಲ. ಅದು ಅಧಿಕಾರದ ಅಹಂಕಾರದಿಂದ ಆಳುವ ಸಂಬಂಧವಲ್ಲ; ಪ್ರೀತಿಯ ವಿನಯದಿಂದ ಬೆಸೆಯುವ ಅನುರಾಗ ಬಂಧ. ಎರಡು ಮನಸ್ಸುಗಳು ಪರಸ್ಪರ ವಿಶ್ವಾಸ, ಗೌರವ ಮತ್ತು ನಿಸ್ವಾರ್ಥತೆಯ ಸೇತುವೆಯ ಮೇಲೆ ಭೇಟಿಯಾದಾಗ ಹುಟ್ಟುವ ಅದ್ಭುತ ಅನುಭವವೇ ನಿಜವಾದ ಸ್ನೇಹ.
ಸ್ನೇಹಕ್ಕೆ ಜಾತಿಯ ಗೋಡೆಗಳಿಲ್ಲ, ಮತದ ಬೇಲಿಗಳಿಲ್ಲ, ವರ್ಣದ ವಿಭಜನೆಗಳಿಲ್ಲ, ಲಿಂಗದ ಮಿತಿಗಳಿಲ್ಲ. ಅದು ಮಾನವೀಯತೆಯ ವಿಶಾಲ ಆಕಾಶದಲ್ಲಿ ಹಾರುವ ಮುಕ್ತ ಹಕ್ಕಿ. ಎಲ್ಲ ರೀತಿಯ ಭೇದಗಳನ್ನು ಮೀರಿ “ನಾವು” ಎಂಬ ಭಾವವನ್ನು ಕಟ್ಟಿಕೊಡುವ ಅದ್ಭುತ ಶಕ್ತಿ ಸ್ನೇಹಕ್ಕಿದೆ. ಆದ್ದರಿಂದಲೇ ನಾಗರಿಕತೆಯ ಬೆಳವಣಿಗೆಯಲ್ಲಿ ಸ್ನೇಹವು ಸಾಮಾಜಿಕ ಸಾಮರಸ್ಯದ ಜೀವನಾಡಿಯಾಗಿದೆ.
ನಿಜವಾದ ಗೆಳೆಯನು ನಮ್ಮ ಯಶಸ್ಸಿಗೆ ಚಪ್ಪಾಳೆ ತಟ್ಟುವವನಷ್ಟೇ ಅಲ್ಲ; ನಮ್ಮ ವೈಫಲ್ಯದಲ್ಲಿ ಹೆಗಲಾಗಿ ನಿಲ್ಲುವವನು. ನಮ್ಮ ಕಣ್ಣೀರಿನ ಭಾಷೆಯನ್ನು ಅರ್ಥಮಾಡಿಕೊಳ್ಳುವವನು, ಮಾತುಗಳಿಗಿಂತ ಮೌನದ ಅರ್ಥವನ್ನು ಗ್ರಹಿಸುವವನು, ನಮ್ಮ ತಪ್ಪುಗಳನ್ನು ಮುಚ್ಚಿಡದೆ ತಿದ್ದುವ ಧೈರ್ಯ ಹೊಂದಿರುವವನೇ ನಿಜವಾದ ಗೆಳೆಯ. ಆತ ನಮ್ಮ ಜೀವನದ ಕನ್ನಡಿಯೂ ಹೌದು, ದಾರಿದೀಪವೂ ಹೌದು.
ಗೆಳೆತನದ ಮೊದಲ ಹೆಜ್ಜೆ ವಿನಯ. ಅಹಂಕಾರವು ಸಂಬಂಧಗಳನ್ನು ಒಡೆಯುತ್ತದೆ; ವಿನಯವು ಅವನ್ನು ಬೆಸೆಯುತ್ತದೆ. ಸ್ವಾರ್ಥವು ಮನಸ್ಸುಗಳನ್ನು ದೂರ ಮಾಡುತ್ತದೆ; ನಿಸ್ವಾರ್ಥ ಪ್ರೀತಿಯು ಅವನ್ನು ಒಂದಾಗಿಸುತ್ತದೆ. ದ್ವೇಷವು ಹೃದಯವನ್ನು ಬರಿದಾಗಿಸಿದರೆ, ಸ್ನೇಹವು ಅದರಲ್ಲಿ ವಸಂತವನ್ನು ಅರಳಿಸುತ್ತದೆ. ಆದ್ದರಿಂದ ಸ್ನೇಹವು ಕೇವಲ ಭಾವನೆಯಲ್ಲ; ಅದು ವ್ಯಕ್ತಿತ್ವವನ್ನು ಪರಿಷ್ಕರಿಸುವ ಮೌಲ್ಯಶಿಕ್ಷಣ.
ಗಿಡದಲ್ಲಿ ಅರಳಿದ ಹೂವು ತನ್ನ ಪರಿಮಳವನ್ನು ತನ್ನೊಳಗೆ ಮಾತ್ರ ಉಳಿಸಿಕೊಳ್ಳುವುದಿಲ್ಲ; ಸುತ್ತಲಿನ ವಾತಾವರಣವನ್ನೇ ಸುಗಂಧಮಯಗೊಳಿಸುತ್ತದೆ. ಅದೇ ರೀತಿ ನಿಜವಾದ ಸ್ನೇಹವೂ ತನ್ನ ಸಾನ್ನಿಧ್ಯದಿಂದ ಬದುಕಿಗೆ ಸೌಂದರ್ಯವನ್ನು ನೀಡುತ್ತದೆ. ಮಗುವಿನ ಮುಗ್ಧ ನಗುವಿನಷ್ಟು ನಿರ್ಮಲ, ಪೂರ್ಣಿಮೆಯ ಚಂದಿರನ ಬೆಳಕಿನಷ್ಟು ಶಾಂತ, ಚೈತ್ರದ ಕೋಗಿಲೆಯ ಇಂಚರದಷ್ಟು ಮಧುರವಾದ ಅನುಭವವೇ ಗೆಳೆತನ.
ಇಂದು ವಿಜ್ಞಾನ ಮತ್ತು ತಂತ್ರಜ್ಞಾನ ಜಗತ್ತನ್ನು ಅಂಗೈಯಲ್ಲಿ ತಂದಿವೆ. ಸಾವಿರಾರು ಸಂಪರ್ಕಗಳು ಕ್ಷಣಾರ್ಧದಲ್ಲಿ ಸಿಗುತ್ತವೆ. ಆದರೆ ಹೃದಯವನ್ನು ಸ್ಪರ್ಶಿಸುವ ಸಂಬಂಧಗಳು ವಿರಳವಾಗುತ್ತಿವೆ. ಪರದೆಯ ಮೇಲಿನ ಪರಿಚಯಗಳಿಗಿಂತ ಮನದಾಳದಲ್ಲಿ ನೆಲೆಸುವ ಸ್ನೇಹವೇ ಮನುಷ್ಯನನ್ನು ಸಂಪನ್ನನನ್ನಾಗಿಸುತ್ತದೆ. ಆದ್ದರಿಂದ ಸಂಬಂಧಗಳ ಸಂಖ್ಯೆಯನ್ನು ಹೆಚ್ಚಿಸುವುದಕ್ಕಿಂತ, ಸಂಬಂಧಗಳ ಸಾರ್ಥಕತೆಯನ್ನು ಉಳಿಸಿಕೊಳ್ಳುವುದು ಇಂದಿನ ಸಮಾಜದ ಅಗತ್ಯವಾಗಿದೆ.
ವಿದ್ಯಾರ್ಥಿ ಜೀವನದಲ್ಲಿ ಗೆಳೆಯರ ಆಯ್ಕೆಯೇ ಭವಿಷ್ಯದ ದಿಕ್ಕನ್ನು ನಿರ್ಧರಿಸುತ್ತದೆ. ಸಜ್ಜನ ಸ್ನೇಹಿತನು ಗುರಿಯತ್ತ ಮುನ್ನಡೆಯುವ ಶಕ್ತಿಯಾಗುತ್ತಾನೆ; ದುರ್ಜನ ಸ್ನೇಹ ಜೀವನದ ಹಾದಿಯನ್ನು ತಪ್ಪಿಸಬಲ್ಲದು. ಹೀಗಾಗಿ ಸ್ನೇಹವನ್ನು ಆಯ್ಕೆ ಮಾಡುವಾಗ ವ್ಯಕ್ತಿಯ ಮೌಲ್ಯಗಳು, ನಡತೆ, ಮಾನವೀಯತೆ ಮತ್ತು ಆದರ್ಶಗಳನ್ನು ಮಾನದಂಡವಾಗಿಸಬೇಕು.
ಜೀವನದ ಸಂಜೆಯ ವೇಳೆಯಲ್ಲಿ ಮನುಷ್ಯನು ಹಿಂದಿರುಗಿ ನೋಡುವುದು ಸಂಪಾದಿಸಿದ ಆಸ್ತಿಯನ್ನಲ್ಲ; ಸಂಗ್ರಹಿಸಿದ ಹುದ್ದೆಗಳನ್ನಲ್ಲ; ತನ್ನೊಂದಿಗೆ ನಡೆದ ಜೀವಂತ ನೆನಪುಗಳನ್ನು. ಆ ನೆನಪುಗಳ ಮಧ್ಯೆ ಚಿರಕಾಲ ಹಸಿರಾಗಿರುವುದು ನಿಷ್ಕಲ್ಮಷ ಗೆಳೆತನವೇ. ಅದು ನೆನಪಿನ ಪುಟಗಳಲ್ಲಿ ಒಣಗದ ಹೂವು; ಕಾಲದ ಪ್ರವಾಹದಲ್ಲೂ ಮಸುಕಾಗದ ಸುಗಂಧ.
ಆದ್ದರಿಂದ ಗೆಳೆತನವನ್ನು ಕಾಪಾಡೋಣ. ಅಹಂಕಾರಕ್ಕಿಂತ ಆತ್ಮೀಯತೆಯನ್ನು, ಸ್ವಾರ್ಥಕ್ಕಿಂತ ಸಹೃದಯತೆಯನ್ನು, ದ್ವೇಷಕ್ಕಿಂತ ಪ್ರೀತಿಯನ್ನು, ದಾನವತೆಗಿಂತ ಮಾನವೀಯತೆಯನ್ನು ಬೆಳೆಸೋಣ. ಏಕೆಂದರೆ ಮನುಷ್ಯನ ಬದುಕನ್ನು ಸುಂದರಗೊಳಿಸುವ ಮಹಾಕಾವ್ಯವಿದ್ದರೆ, ಅದರ ಮೊದಲ ಅಧ್ಯಾಯವೇ ಗೆಳೆತನ.
ಎ.ಎಂ.ಪಿ ವೀರೇಶಸ್ವಾಮಿ
ಹೊಳಗುಂದಿ. 9008527708
